Хэвлэл мэдээлэл
Хэвлэлийн мэдээ

Оюу толгойн инженерүүд “Монгол инженер – 2018” нэгдсэн арга хэмжээнд оролцлоо

Инженерүүдийн улсын олимпиад, сургалт, хурал зөвлөгөөн, үзэсгэлэнгээс бүрдэх уг төсөл нь инженер техникийн ажилтан, их дээд сургуулиудын дунд зохион байгуулагдаж байгаа бөгөөд тэдэнд тодорхой салбарт тулгарч буй асуудлын хүрээнд шинжлэх ухаанд суурилсан шийдэл олох замаар ур чадвараа сайжруулах боломж олгоход чиглэж байгаа юм.

Оюу толгойн инженерүүдээс бүрдсэн баг тус олимпиадад өнгөрсөн амралтын өдрүүдээр оролцож багийн тэмцээнд өрсөлдөснөөс гадна ахлах инженер С.Алтангэрэл эрдэм шинжилгээний хурлаар Оюу толгойн баяжуулах үйлдвэрийн талаар танилцуулж, тулгарсан механик асуудалд хэрхэн шийдэл олсон талаараа оюутнуудтай хуваалцсан юм.
Оюу толгой компани өндөр технологи, дэлхийн түвшинд мэргэшсэн инженерүүдтэй. Мэдлэг, ур чадвар, шилдэг туршлагаа инженерээр суралцаж байгаа монгол оюутан залуустай хуваалцах нь эрдэс баялгаас эрдэм мэдлэг, ур чадвар, үнэт зүйлс бүтээлцэх бидний алсын харааны нэг хэсэг юм.
Олимпиадад оролцсон оюутан залуус, инженерүүд болон төслийг зохион байгуулсан шинжлэх ухаан технологийн их сургуулийн механик инженер, тээврийн сургуулийн багш хамт олонд амжилт хүсье! Монгол инженерийн ур чадвар монголын баялаг юм.

“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар, “Туркойз Хилл Ресурс” болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.