Хэвлэл мэдээлэл
Хэвлэлийн мэдээ

“Оюу толгой” компани гүний уурхайн бүтээн байгуулалтад шаардлагатай томоохон гэрээ байгууллаа

Монгол Улс, Улаанбаатар хот,

“Оюу толгой” компани өнөөдөр техникийн болон мэргэжлийн үйлчилгээ, барилгын үйл ажиллагаагаараа дэлхийд тэргүүлэгч компаниудын нэг Жэйкобс Инженеринг Групптэй инженерийн ажил, ханган нийлүүлэлт, барилга угсралт, менежментийн (EPCM) гэрээг байгууллаа. Энэхүү гэрээ байгуулагдсанаар гүний уурхайн бүтээн байгуулалтын ажлыг улам эрчимжүүлэх чухал алхам болж байна.

Жэйкобс компани нь Монгол Улсад бүртгэлтэй бизнесийн нэгжээ аль хэдийнэ байгуулсан ба ирэх 5-7 жилийн хугацаанд дотоодын оролцогч талуудтай хамтран ажиллаж, гэрээнд заагдсан ажлыг гүйцэтгэнэ.

”Оюу толгой” компанийн Гүний уурхайн төслийн захирал Марко Пирес “Өнгөрсөн сард Оюу толгойн гүний уурхайн бүтээн байгуулалтыг үргэлжлүүлэх шийдвэр гарсаны дараагаар энэхүү гэрээ байгуулагдаж байгаа нь бүтээн байгуулалтын ажлыг бүрэн хэрэгжүүлэхэд чухал алхам болж байна.

Оюу толгойн гүний уурхай шиг том төслийг цаг хугацаанд нь, тогтоосон төсөвт багтааж, хамгийн чухал нь аюулгүйгээр гүйцэтгэхэд шаардлагатай арвин туршлага, өндөр ур чадвар Жэйкобс компанид бий” хэмээн онцоллоо.

“Оюу толгой” компанийн Гүйцэтгэх захирал Эндрью Вүдлэй “Энэхүү нүсэр бүтээн байгуулалт урагшлахын хэрээр Оюу толгой болон Жэйкобс компани нь Монгол Улсын олон зуун аж ахуйн нэгжтэй нягт хамтран ажиллах болно. Энэ гэрээ байгуулагдсанаар Монгол Улс дэлхийн зэсийн зах зээлд гол тоглогч болон төлөвшихөд онц ач холбогдолтой алхам боллоо” хэмээн мэдэгдлээ.

Жэйкобс компанийн Ерөнхийлөгч бөгөөд Гүйцэтгэх захирал Стив Деметрюу “Оюу толгой, Монгол Улс, мөн цаашлаад олон улсын зэсийн салбарт чухал ач холбогдолтой энэхүү төсөлд оролцон ажиллах болсноороо бид их бахархаж байна. Оюу толгойн гүний уурхайн төсөл нь олон улсад хэрэгжиж буй хамгийн том уул уурхайн төслүүдийн нэг ба захиалагч компани болон Монгол Улсын ирээдүйн хөгжил дэвшилд хувь нэмэр оруулах болсондоо туйлын их баяртай байна” гэж хэлсэн байна.

Жэйкобс компани нь гүний уурхайн бүтээгдэхүүн, тоног төхөөрөмж тээвэрлэлт, түүнтэй холбогдох гадаргын болон газрын гүний дэд бүтцийг хариуцан ажиллах болно. Энэхүү төсөл 5-7 жилийн хугацаанд үргэлжилнэ гэсэн тооцоотой байна.

“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар, “Туркойз Хилл Ресурс” болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.