Хэвлэл мэдээлэл
Хэвлэлийн мэдээ

“Оюу толгой” компани Ханбогд суманд Иргэдийн хөгжлийн төвийг хүлээлгэн өглөө

Өмнөговь аймаг, Ханбогд сум - Өмнөговь аймгийн Ханбогд суманд Иргэдийн хөгжлийн төв өнөөдөр үүдээ нээлээ. Уг төвийг “Оюу толгой” компани санхүүжүүлж байгуулсан юм.

Иргэдийн хөгжлийн төв нь орон нутгийн иргэд, сонирхлын бүлгүүд, Төрийн бус байгууллага, аж ахуйн нэгжүүд, хоршоод болон “Оюу толгой” компанийн хүсэлтээр олон нийтийн арга хэмжээ, уулзалт, хурал зөвлөлгөөн, сургалтыг тав тухтай, тохилог орчинд зохион байгуулах бололцоог бүрдүүлэх зорилготой юм.

“Оюу толгой” ХХК-ийн Үйл ажиллагаа эрхэлсэн дэд захирал Айвен Велла нээлтийн үеэр хэлэхдээ “Аюул осолгүй, тогтвортой үйл ажиллагаа бүхий зэсийн уурхайг бүтээн байгуулахын зэрэгцээ эрдэс баялгаас эрдэм мэдлэг, ур чадвар, үнэт зүйлс бүтээлцэх нь Оюу толгойчуудын эрхэм зорилго билээ. Мэдээллийн технологийн сүүлийн үеийн бүтээгдэхүүн, интернэт, компьютер, сургалтын төхөөрөмжөөр тоноглосон Иргэдийн хөгжлийн төв нь Ханбогд сумын төдийгүй зэргэлдээ сумдын залууст говь нутгаасаа дэлхийг таньж мэдэх үүд хаалгыг нээж өгнө гэдэгт эргэлзэхгүй байна. Түүнчлэн бизнес эрхлэгчид, хоршоодынхон энэ төвөөр үйлчлүүлж, өөрсдийн хөгжилд тус нэмэр болох мэдлэг, мэдээллийг олж авна гэж итгэж байна” гэлээ.

Ханбогд сумын ИТХ-ын дарга Х.Нэхийт “Өнөөдөр та бид маш том бүтээн байгуулалт, хамтран ажиллах шинэ сайхан төвтэй боллоо. Энэхүү Иргэдийн хөгжлийн төвийг “Оюу толгой” компани анхлан санаачилж, өөрийн хөрөнгөөр барьж байгуулж өгснийг онцлон тэмдэглэхэд нэн таатай байна. Сүүлийн жилүүдэд “Оюу толгой” компанийн тусламжтайгаар манай суманд олон сайхан бүтээн байгуулалт бий болсон билээ. Энэ бол “Оюу толгой” компанийн орон нутгийн хөгжлийг дэмжих талаар ихээхэн санаа тавьдгийн илэрхийлэл юм. Тус компанийн удирдлага, хамт олонд сумынхаа ард иргэдийн өмнөөс гүн талархлаа илэрхийлье” гэв.

Төвийн барилгыг Монголын компани барьсан бөгөөд 100 хүний суудалтай хурлын танхимаас гадна найдвартай үйл ажиллагааг хангах орчин үеийн тоног төхөөрөмж суурилуулжээ. Төвийн үйл ажиллагааг сумын иргэдийн төлөөлөл, Засаг даргын тамгын газар, “Оюу толгой” компанийн хамтарсан зөвлөл эрхлэн явуулах юм.

“Оюу толгой” компани саяхан Өмнөговь аймаг болон тус аймгийн Ханбогд, Манлай, Баян-Овоо, Даланзадгад сумдтай “Хамтын ажиллагааны гэрээ” байгуулсан билээ. Уг гэрээ нь орон нутгийн эдийн засгийн хөгжил, нийгмийн дэд бүтэц, байгаль орчин, соёлын өвийг хамгаалах зэрэг асуудлуудад голчлон чиглэсэн юм.

“Оюу толгой” компани Өмнөговь аймгийн тогтвортой хөгжлийг дэмжсэн төсөл, хөтөлбөрүүдийг үргэлжлүүлэн хэрэгжүүлж байна. 2015 оны нэгдүгээр улиралд эрүүл мэнд, аюулгүй ажиллагаа, орон нутгийн дэд бүтэц, бэлчээрийн менежмент, малчдын худгийг сэргээх зэрэг үйлсэд 280 мянга орчим ам.доллар зарцууллаа.

“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар, “Туркойз Хилл Ресурс” болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.