Хэвлэл мэдээлэл
Мэдээ

Оюу Толгой ХХК-ийн Орон нутгийн шилдэг ханган нийлүүлэгч тодорно

Дэлгэрэнгүй мэдээллийг:
Ц.Ганзориг
Утас: 9908-5617

Ханбогд, Даланзадгад болон Өмнөговийн бусад суманд үйл ажиллагаа эрхэлдэг 3 ханган нийлүүлэгч орон нутгийн шилдгээр шалгарна

Монгол улс, Улаанбаатар (ot.mn) Оюу Толгой ХХК 2011 оны шилдэг ханган нийлүүлэгчийн шагнал гардуулах “Эрдэнийн Говь” арга хэмжээг энэ Пүрэв гарагт зохион байгуулж шилдэг 20 ханган нийлүүлэгчийг шалгаруулах бөгөөд эдгээрийн дундаас орон нутгийн хөгжилд хувь нэмрээ оруулж буй Ханбогд сумын шилдэг ханган нийлүүлэгч, Даланзадгад сумын шилдэг ханган нийлүүлэгч болон Өмнөговь аймгийн бусад суманд үйл ажиллагаа явуулдаг шилдэг ханган нийлүүлэгч ангиллаар 3 аж ахуйн нэгжийг тодруулах юм.

Оюу Толгой ХХК-ийн Бүс нутгийн хөгжил, нийгмийн асуудал эрхэлсэн Дэд захирал Т.Баярсайхан, “Манай компанийн эн тэргүүний зорилт бол орон нутгийн хөгжлийг дэмжих бодлого, түүний хэрэгжилт билээ. Өмнөговь аймгийн Даланзадгад, Ханбогд, Манлай, Баян-Овоо зэрэг уурхайн нөлөөллийн сумдад төслийн сөрөг нөлөөллийг бууруулах, орон нутгийн усан болон цахилгаан хангамжийг сайжруулах, ажлын байр бий болгох, хөдөлмөрийн эрхлэлтийн чадавхийг дээшлүүлэх, нутгийн соёлын өвийг хамгаалах, иргэдийн эрүүл мэндийг дэмжих чиглэлээр дорвитой ажлуудыг үр бүтээлтэй, амжилттай хийж гүйцэтгэхэд орон нутгийн ханган нийлүүлэгч, үйлчилгээ үзүүлэгч компаниудын оролцоо, үүрэг хамгийн чухал юм” гэж онцоллоо.

Орон нутгийн бизнес, жижиг дунд үйлдвэрлэлийг дэмжих зорилгоор Оюу Толгой ХХК 1,5 тэрбум төгрөгийн хөнгөлөлттэй зээлийн эх үүсвэрийг гаргаж ХААН болон Хас банкны орон нутгийн салбарт байршуулан зээл олгож эхэлсэн 2010 оноос хойш өдгөө 84 бизнес эрхлэгчид 850 гаруй сая төгрөгийн зээл авч шинээр бизнес эрхлэх, бизнесээ өргөтгөх боломжтой болоод байгаа билээ.

Мөн Өмнөговь аймгийн 9 сумын нийт 200 гаруй ханган нийлүүлэгчид Оюу Толгой төсөлд нийт 3,2 тэрбум төгрөгийн ажлын хувцас, оёмлол нэхмэл бүтээгдэхүүн, ус, хүнсний бүтээгдэхүүн, гар урлалын зүйлс, барилга угсралтын ажил гэх зэрэг бараа үйлчилгээг ханган нийлүүлсэн үзүүлэлтээр 2011 оныг үдсэн байна. Түүнчлэн аймгийн төвд байрлах орон нутгийн ханган нийлүүлэгчдийн чадавхийг бэхжүүлэх зорилго бүхий Бизнес хөгжлийн төвийг Оюу Толгойн хөрөнгө, санаачилгаар байгуулснаас хойш өдгөө 6 мянга гаруй бизнес эрхлэгчид, нутгийн иргэдэд хүрч үйлчлээд байна.

Оюу Толгой ХХК-ийн тухай (www.ot.mn)

Оюу Толгой ХХК нь Монголын өмнөд хэсэгт Оюу Толгойн зэс-алтны төслийг хэрэгжүүлж буй Монголын Уул Уурхайн Компани юм. Оюу Толгой нь дэлхий дээр нээгдээд буй порфирын төрлийн зэс-алтны томоохон ордын нэг болно. 2009 оны 10 дугаар сард Монгол Улсын Засгийн Газар, Айвенхоу Майнз түүний стратегийн түнш болох Рио Тинто компанийн хооронд байгуулагдсан Хөрөнгө оруулалтын гэрээний дагуу үйлдвэрлэлийг 2013 оноос эхлүүлэхээр ажиллаж байна. Оюу Толгой ХХК-ийн 66%-ийг Айвенхоу Майнз, 34%-ийг Монгол Улсын Засгийн Газар тус тус эзэмшдэг.

Оюу Толгой ХХК нь байгаль орчин, өөрсдийн ажилтан ажиллагсдын эрүүл мэнд, аюулгүй байдалд анхаарч, тогтвортой хөгжилд хувь нэмрээ оруулж, чин шударгаар үйл ажиллагаагаа явуулахыг эрхэмлэдэг. Бид үйл ажиллагаа явуулж буй орон нутгийн иргэдтэй хамтран ажиллаж, хууль журам, зан заншлыг мөрдөн сахиж, эрх тэгш үр ашгийг хангадаг билээ.

Оюу Толгойн Фейсбүүк болон Твиттер хаягаар бидэнтэй холбогдож болно.

“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар, “Туркойз Хилл Ресурс” болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.